Енди Мареј е нов лидер во светскиот тенис. Британецот го презеде првото место на АТП листата од Новак Ѓоковиќ по пласманот во големото финале на Мастерсот во Париз и во понеделник ќе има пет бода пповеќе од Србинот. Во полуфиналето мина без борба, откако Милош Раониќ го предаде мечот. Таквата одлука ја образложи со повреда на бутниот мускул во дуелот со Жо Вилгред Цонга претходно. Ривал на Мареј во мечот за титулата ќе биде Џон Иснер кој славеше во два сета против Марин Чилиќ со 6:4, 6:3.
Мареј за првпат во кариерата е на водечката позиција и прв Британец кој успеал во тоа од 1973 година кога за првпат беше воведено рангирање кај тенисерите. Со своите 29 години стана и највозрасен играч што за првпат е светски рекет број еден. Рекордер останува Џон Њукомб кој во 1974 година изби на лидерската позиција на возраст од 30 години.
Ѓоковиќ во Париз беше елиминиран во четвртфиналето од Марин Чилиќ. Вчера ја загуби можноста за одбрана на тронот, а денеска го загуби и првото место на АТП листата. На врвот беше 122 недели едноподруго, Мареј, пак, 72 седмици мина како втор во светот.