Новак Ѓоковиќ се симна од тронот на Ју-Ес опен. Српскиот тенисер ја заврши одбраната на титулата на гренслемот во Њујорк по принудно предадениот осминафинален меч со Стен Вавринка поради болки во рамото и при водство на Швајцарецот со 6:4, 7:5 и 2:1 во третиот сет.
Најдобриот светски рекет во моментот не искористи брејк можност во петтиот гем од воведниот сет. Вавринка се одбрани, а потоа и успешно го нападна сервисот на Ѓоковиќ за водство во мечот. Српскиот тенисер имаше предност од 4:1 во наредниот сет по што противникот направи пресврт, нов брејк во 11 гем и потврда во наредниот за 2:0.
Во паузата меѓу вториот и третиот гем, Ѓоковиќ побара медицински тајм аут, собра сили за уште три гема и по час и 46 минути реши предвреме да му подаде рака на 23. носител на турнирот.
„Болката трае со недели. Некогаш е посилна, некогаш послаба. Жалам за публиката која сакаше да гледа цел меч, но едноставно не можев да продолжам“, рече Ѓоковиќ по мечот.
Неговата одлука да се предаде беше проследена со свирежи од трибините на што истакна дека не се чувствува навреден.
„Не е никаква тајна дека цел ми е да освојам најмногу гренслем титули, да го достигна рекордот на Федерер. Но, истовремено сум свесен дека тоа е долг пат. Се надевам дека ќе може да играм уште неколку години. Не го гледам крајот и најважно ми е да го сочувам телото“, заврши Ѓоковиќ кој се очекува да се врати на АТП турнирот во Токио ако рехабилитацијата оди по план.
Нареден ривал на Вавринка во Њујорк ќе биде Русинот Данил Медведев кој во четири сета го елиминира Германецот Кепфер со 3:6, 6:3, 6:2, 7:6.
Резултати од осминафиналните мечеви на Ју-Ес опен
Мажи
Вавринка (23., Швајцарија) – Ѓоковиќ (1., Србија) 6:4, 7:5, 2:1 / Ѓоковиќ го предаде мечот
Федерер (3., Швајцарија) – Гофан (15., Белгија) 6:2, 6:2, 6:0
Медведев (5., Русија) – Кепфер (Германија) 3:6, 6:3, 6:2, 7:6
Димитров (Бугарија) – Де Минаур (Австралија) 7:5, 6:3, 6:4
Жени
Ванг (18., Кина) – Барти (2., Австралија) 6:2, 6:4
Конта (16., В. Британија) – Ка. Плишкова (3., Чешка) 6:7, 6:3, 7:5
Свитолина (5., Украина) – Киз (10., САД) 7:5, 6:4
С. Вилијамс (8., САД) – Мартиќ (22., Хрватска) 6:3, 6:4