Марјан Вајда (56) е новиот главен тренер на Новак Ѓоковиќ. Словакот веќе цела деценија е заедно со српскиот тенисер. Соработката ја отпочнаа во 2006 година, а продолжуваат заедно и во наредниот период по разделбата со Борис Бекер.
Вајда е роден во Повашка Бистрица во 1960 година во тогашна Чехословачка. Како активен тенисер има две турнирски победи, во Прага во 1987 година и во Цирих во 1988 година и има уште два пораза во финални мечеви. На гренслем турнирите никогаш не стигнал подалеку од третото коло, а негов најдобар ппласман на АТП листата е 34 место. Кариерата ја заврши со биланс од 119 победи и 154 порази.
Како тренер, пак, бележи сосема поинакви моменти. Со успех работеше како селектор, најпрво, на машката тениска репрезентација на Словачка, а потоа и на женската. Понудата на Ѓоковиќ ја прифати во 2006 година кога Србинот беше 40 рекет во светот, 2007 година ја заврши на петтото место, 2008 на третото. Под негово водство, на 4 април во 2011 година, Ѓоковиќ за првпат се проби до челната позиција на ранг листата. Беше дел од стручниот штаб при освојувањето на сите 12 гренслем титули.