Тајгер Вудс (41) утрово беше уапсен под сомнение дека управувал со својот автомобил под дејство на алкохол во близина на неговиот дом на Флорида, пренесуваат светските медиуми.
Поранешниот светски голфер број еден бил запрен од полициска патрола во местото Јупитер во околината на Мајами околу три часот изутрина, покажуваат снимки од безбедносните камери. По седум часа минати во локалниот затвор бил пуштен на слобода.
Настанот доаѓа по само неколку денови од изјавата на 14 кратниот сопственик на трофеи од големите голф турнири дека „одамна не се чувствувал вака добро“, особено по рехабилитацијата од четвртата операција на грбот од 2014 година.
„Тукушто измина еден месец од најновиот зафат на грбот и тешко е да опишам колку подобро се чувствувам. Наеднаш се ослободив од болката. Вака не ми било со години“, рече Вудс во четвртокот.
Притоа тој додаде дека е само прашање на време кога повторно ќе биде на лидерската позиција во ПГА турот.