Попладнево пожар избувна во Националниот парк Пелистер. Телевизија Тера од Битола повикувајќи се на информациите од терен објави дека гори под местото Козји камен во правец на селото Арвати. Тоа е од страната Маловишта.
Бидејќи се работи за непристапен терен, од Националниот парк побарале од Дирекцијата за заштита и спасување да испратат авиони за гаснење.
Последните информации до кои дојде ТВ Орбис велат дека пристигнати се три авиони кои веќе започнаа со гасење на пожарот на Пелистер.
Од информациите од терен дознаваме дека ветерот прави проблеми во гасењето на пожарот.
Од Центарот за управување со кризи потврдуваат дека активен пожар има во Националниот парк „Пелистер“, кај место викано „Изворите“ на река Шемница над село Маловишта.
Гори трева и нискостеблести растенија, но има опасност пожарот да се прошири во букова шума.
Известени се ЕЛС Битола, ДЗС Битола, НП Пелистер Битола, ТППЕ Битола, МЗШВ Битола и СВР Битола. На терен се излезени екипи од НП Пелистер, ТППЕ Битола и од ДЗС Битола, велат од ЦУК.
На социјалните мрежи битолчани и жители на околните места објавуваат фотографии на кои се гледа како се издига чад од планината.
Активен пожар има во местото викано „Кравица“ на планината Ниџе. Гори борова шума во доста непристапен предел. Известени се МШ „Кајмакчалан“- Битола, ЕЛС Новаци, МЗШВ Битола и ДЗС Битола, вака соопштуваат од Центарот за управување со кризи.