Гест за почит на Клаудио Раниери. По освоената титула во Премиерлигата, Италијанецот во петокот доби отказ во Лестер, а денеска ја воодушеви целокупната јавност во Англија. Наместо изливи на лутина и сензационалистички изјави, тој реагираше господски.
Половина од отпремнината од три милиони фунти, што управата на „лисиците“ е должна да му ја исплати, ја донираше во клупскиот хуманитарен фонд „Фоксес Фондејшн“ зад кој стојат навивачите.
Навивачите се бесни на одлуката на раководството на Лестер за разделба со менаџерот кој ја предводеше екипата до историски успех во минатата сезона. Но, Раниери ќе остане вечно во нивните срца. Дека неговиот дух е сè уште присутен на „Кинг Пауер“ стадионот и ќе остане, покажа во мечот против Ливерпул вечерва.
Навивачите пристигнаа на мечот со маски со ликот на Раниери, а на една од трибините беше истакнат голем транспарент со порака „Grazie Claudio“. Пораки со благодарност за стореното со клубот, во помал формат, имаше десетици на стадионот на Лестер.