Од готово – вересија направија македонските одбојкари во вториот настап во квалификациите за Европското првенство во 2019 година. Имаа 2:0 против Украина на домашен терен што, сепак, не беа доволни за триумф и осамнување на лидерската позиција на табелата пред двомечот со Швајцарија. Конечни 2:3 за Украинците, исход што може многу да ги чини „црвено-жолтите“ на крајот на циклусот и покрај освоениот бод вечерва во СРЦ „Кале“ и двата пред неколку дена во Будимпешта по победата над Унгарија со 3:2.
Македонските одбојкари почнаа како што посакуваа против Украина. На разлика ги освоија првите два сета (27:25, 26:24), но наместо да продолжат во ист стил, дозволија пресврт иако во сите три што следуваа имаа позитива во најголем дел од нив. Причините можеби лежат во заморот, во предвремената помисла дека работата е завршена или, пак, од издигнување на ривалот. Наредните два ги загубија со 20:25 и дозволија петти сет во кој осоколените гости го добија со 15:12 за втора нивна радост во Ф конкуренцијата по 138 минути игра.
Никола Ѓорѓиев и овојпат беше лидер во националниот тим со 25 освоени поени, Дарко Ангеловски имаше 38 отсто успешност во приемот на противничките сервиси, најдобар на мрежа беше Филип Маџунков со три блока.
Веќе во среда (СРЦ „Кале“), Македонија го дочекува аутсајдерот во групата Ф, Швајцарија, а три дена подоцна во Шененверд ќе следува реванш со истиот противник. Потоа ќе настапи пауза во квалификациите до почетокот на 2019 година за кога се закажани последните два меча во групната фаза. На први јануари е гостувањето во Украина, на деветти, во последното коло, дуелот на домашен терен со Унгарија.
Европското првенство во 2019 година ќе се одржи од 12 до 29 септември во ко-организацијата на Франција, на Белгија, на Словенија и на Холандија.
Одбојка (м) – квалификации за ЕП 2019
Група А, 2 коло
Данска – Финска 1:3 (19:25, 25:17, 21:25, 17:25)
Табела: Финска 3 (-1), Романија 2 (-1), Данска 1.
Група Б, 2 коло
Летонија – Естонија (недела, 19 ч.)
Табела: Израел 3 (-1), Летонија 1 (-1), Естонија 0 (-2).
Група Ц, 2 коло
Исланд – Молдавија (недела, 18 ч.)
Црна Гора – Словачка (недела, 20.15 ч.)
Табела: Словачка 3 (-1), Молдавија 2 (-1), Црна Гора 1 (-1), Исланд 0 (-1).
Група Д, 2 коло
Хрватска – Португалија 0:3 (18:25, 22:25, 18:25)
Албанија – Австрија (недела, 20 ч.)
Табела: Португалија 6, Австрија 3 (-1), Хрватска 0, Албанија 0 (-1).
Група Е, 2 коло
Норвешка – Грузија 3:0 (25:20, 25:19, 25:13)
Белорусија – Шпанија (недела, 16 ч.)
Табела: Шпанија 3 (-1), Белорусија 3 (-1), Норвешка 3, Грузија 0.
Група Ф, 2 коло
Македонија – Украина 2:3 (27:25, 26:24, 20:25, 20:25, 12:15)
Швајцарија – Унгарија (недела, 18.30 ч.)
Табела: Украина 5, Македонија 3, Унгарија 1, Швајцарија 0.
Група Г, 2 коло
Шведска – Грција 0:3 (20:25, 20:25, 16:25)
Луксембург – Азербејџан 2:3 (28:30, 23:25, 25:23, 25:20, 11:15)
Табела: Грција 6, Азербејџан 4, Луксембург 1, Шведска 1.