Новогодишната прослава за дочек на 2017 година на плоштадот Македонија се откажува, информираа од Град Скопје.
Парите коишто беа планирани за организирање на дочекот околу 2 милиона денари, Градот ќе ги донира во социјални цели. Одлуката каде ќе се донираат парите ќе ја донесе Советот на Град Скопје.
„Градот Скопје веќе 10 години троши минимални средства за организирање на овие забави, а финансирањето е од мoбилните оператори во земјава. Годинава спонзор на забавата требаше да биде Македонски Телеком“, пишува во соопштението на Град Скопје .
Бобан Милошоски, сопственикот на Авалон продукција, на својот профил на „Фејсбук“ напиша дека ако Град Скопје го откаже дочекот, тие ќе тужат.
„Ако Градот Скопје се откаже од дочек на Нова година и со тоа ги оштети македонските артисти и продукцијата од Македонија, Авалон Продукција ќе го тужи Град Скопје и ќе бара во целосно да бидат исплатени сите трошоци. Исто така, од хуманитарни принципи ќе покренеме петиција градоначалникот Коце Трајановски и вработените во Град Скопје своите шест месечни плати да ги донираат на сиромашните. Нова година на пејачите во МКД им значи живот исто како на секој сто работи за плата. Пејачите за Нова година заработуваат за живот…и нив тој термин им знаци како на некој вработен шест плати“, напиша Милошоски.
Новогодишните прослави ги откажаа и општините Куманово и Велес.