Градоначалникот на Мариупол пред малку ги повика жителите на опколениот град Мариупол да се евакуираат преку коридорот што претходно во текот на денот го најави заменик-премиерот на Украина.
Почетокот на евакуацијата е закажан за 14 часот по локално време на назначеното централно место за собирање, рече градоначалникот на Мариупол, Вадим Боиченко во изјавата објавена од градскиот совет. Дополнителни локации за качување во возилата за евакуација ќе бидат достапни во близина на фабриката за челик Азовстал – бастион на украинската воена одбрана – и кај трговскиот центар.
Колоната со евакуација, рече тој, ќе продолжи западно од Мариупол кон градот Бердианск, кој е под контрола на Русија, а потоа ќе продолжи преку градот Запорожје, кој е контролиран од Украина, преку Токмак.
„Почитувани жители на Мариупол, за време на овие долги и неверојатно тешки денови преживеавте во нехумани услови“, рече тој. „Бевте во информативен вакуум без пристап до какви било информации. Можеби сте слушнале различни работи. Но, сакам да ја знаете главната работа – ве чекаат во Запорожје. Таму е безбедно“, порача градоначалникот.
Бојченко рече дека 200.000 жители на Мариупол успеале да го напуштат градот и дека сега се безбедни. Тој ги повика граѓаните со роднини во Мариупол да ја пренесат веста за местата за евакуација.
Градот имаше предвоено население од над 400.000, а украинските власти ја обвинија Русија дека принудува илјадници други жители да се преселат на територијата на сепаратистите како и во Русија.