Можната грчка блокада на преговорите за членство со Македонија на самитот на ЕУ во јуни може да има тешки последици за целиот регион, предупредува Ерван Фуере, поранешен амбасадор на ЕУ во Македонија а денес истражувач во Центарот за политички европски студии (ЦЕПС) во Брисел.
Европската комисија (ЕК) и на Македонија се надеваат дека земјите членки на ЕУ во јуни ќе и дозволат на нашата земја да започне преговори за членство во ЕУ.
Но, постојат тешки и одлучувачки прашања што треба да бидат решени за да може ЕУ да ја прими како нова членка: реформата на ЕУ пред идното проширување и вечното прашање за спорот со Грција.
На овие прашања се обидува да одговори Фуере во својот коментар за ЦЕПС.
Изјавата францускиот претседател Емануел Макрон во Европскиот парламент на 17 април (истиот ден кога ЕК ја објави својата препорака за Македонија) јасно укажува дека во некои земји членки постои колебање околу проширувањето на ЕУ.
“Иако не е против самото проширување, тој бара понатамошно продлабочување на европската интеграција пред да се прифатат нов земји членки”, објаснува Фуере. И додава дека ЕУ “ќе треба да ја искористи целата своја моќ на убедување за да им покаже на тие земји членки дека која е користа од примањето на Западниот Балкан во ЕУ”, вели Фуере.
Спорот со Грција досега никогаш не бил толку блиску до разврска како што тоа е сега, со новата македонска влада и јасната желба на грчкиот премиер да му се стави крај на овој спор.
Фуере, како и многумина во нашата јавност, се прашува дали стопирањето на груевистичката политика за антиквизација, гестовите на добра волја на македонска влада и напредокот во преговорите, ќе бидат доволни за да Грција го крене своето вето.
Грчкиот министер за надворешни работи Никос Коѕиас изјви дека нема да биде можно Македонија да влезе во НАТО на самитот во јули ако спорот не биде решен.
“Ако Грција го задржи тој став на Европскиот самит во јуни, тоа ќе има тешки последици не само за политичката стабилност во Македонија, туку тоа ќе ја наруши кредибилноста на Европската комисија и на целата ЕУ, но ќе биде нарушена и кредибилноста на покажаната добра волја на Грција”, вели Фуере во својот коментар.
И додава дека во сето ова, доколку се оствари ова сценарио, ќе има колатерални штети:
“Повторување на она што се случи на НАТО самитот во Букурешт во 2008 година, кога Албанија беше прифатена за членка а Македонија блокирана поради Грција, мора по секоја цена да биде избегнато и покрај тоа што овде зборуваме само за почеток на преговори за членство во ЕУ. Влијанието што тоа може да го предизвика кај етничката албанска заедница во Македонија (кое подразбира околу 25 отсто од населението според последниот попис од 2002 година) би можело да се прелее вон Македонија”, предупредува поранешниот амбасадор.
Поради напредокот во преговорите помеѓу Атина и Скопје добро би било Грција да дозволи почеток на преговорите со ЕУ додека преговорите за името можат да продолжат.
“Тоа ќе испрати порака на доверба, ќе ја зајакне кредибилноста на ЕУ политиката кон Западниот Балкан и, што е уште поважно, ќе даде и поддршка на долгорочната меѓу-етничка стабилност во регионот”, заклучува Фуере.