Изјавата на премиерот Зоран Заев дадена вчера по судењето за предметот „Поткуп“, во однос на спорот со името, во која рече дека Македонија треба да постапува со Македонците кои се надвор од неа, исто како што Грција го прави тоа според нејзиниот Устав, во Атина се смета за провокација.
„Мора да водиме грижа едни за други за да го сочуваме достоинството на двата народа, на двете земји и на двете нации и секако за зачувување на она што значи чувство, а тоа е идентитетот. Идентитетот е чувство и за него не можете да преговарате, да се ценкате. Јас верувам дека во тој дух, водејќи се внимателно кон партнерите со кои преговараме ќе изнајдеме решение, а истовремено да се отвори и Уставот на Грција и да видиме како тие водат грижа за Грците надвор од Грција… така и ние да водиме грижа за Македонците надвор од Македонија, соодветно исто“, рече Заев.
Како што јавува МИА, грчките медиуми, со различни наслови, оваа изјава на македонскиот Премиер ја пренесуваат како провокација од македонската страна.
„Провокација од Заев: И Грција да го отвори нејзиниот Устав“;
„Заев: Промената на Уставот не е решение, го решивме иредентизмот“;
„Провоцира Заев: Ненадејно поставува прашање за споредба на грчкиот со скопскиот Устав“;
„Предлог од Заев за меѓународен договор наместо промена на Уставот на ПЈРМ – отвора прашање и за грчкиот Устав“;
„Заев: Да го отвориме и Уставот на Грција“, се само дел од насловите во грчките медиуми.
Онлајн изданието на весникот „Прото тема“ во анализа упати остри критики до македонската страна дека се повеќе зацврстува одредени позиции и одбива непреведено име, промена на Уставот, промена на името за внатрешна употреба итн.
„ Да се отвори прашање и за грчкиот Устав, беше неверојатната провокација од Заев. Не отстапуваат, негираат каква било промена на нивниот Устав, повторно во игра го враќаат Метју Нимиц и ја очекуваат посетата на Никос Коѕијас во втората половина на март“, објави весникот дополнувајќи дека почетната клима на еуфорија сега била заменета со мудрост, а пресвртна точка била средбата на шефовите на дипломатиите на двете земји минатиот месец во Виена.
Заев исто така рече дека прашањето со иредентизмот е затворено со измените на имињата на автопатот Е-75 во „Пријателство“ и на аеродромот во Скопје.
Од друга страна пак, портпаролот на грчката влада вчера потенцираше дека Атина инсистира на промена на Уставот, за да биде исполнет условот ерга омнес.