ВМРО-ДПМНЕ соопшти дека на вчерашната седница на Централниот комитет, при првото гласање не било постигнато потребното двотретинско мнозинство за одржување на вонреден Конгрес за избор на нов претседател на партијата.
„Пред второто гласање од страна на претседателот Груевски беше посочено дека не станува збор за гласање „за или против“ него, и со дополнителни аргументи ги убедуваше членовите на ЦК да поддржат одржување на Конгрес. Потоа во вториот обид огромно мнозинство членови на ЦК на ВМРО-ДПМНЕ ја поддржа одлуката за одржување на вонредниот 16-ти Конгрес во Валандово“, соопшти ВМРО-ДПМНЕ.
Централниот комитет на ВМРО-ДПМНЕ синоќа донесе одлука со која што 22 и 23 декември 2017 година ги утврди како датум на одржување на вонредниот 16-ти Конгрес. Вонредниот 16-ти Конгрес на ВМРО-ДПМНЕ ќе се одржи во Валандово, а согласно Статутот на партијата на него ќе учествуваат 544 делегати од редовниот 15-ти Конгрес на ВМРО-ДПМНЕ.
Врз основа на Статутот на партијата, Централниот комитет усвои заклучок согласно кој кандидат за претседател на партијата може да предложат најмалку 30 делегати на Конгресот. Еден делегат може да поддржи само една кандидатура за претседател на ВМРО-ДПМНЕ. Кандидатурите може да се поднесуваат најдоцна до 21 декември до 15 часот до правната комисија на ВМРО-ДПМНЕ, во архивата на партијата.
Оваа одлука беше донесена од Централниот комитет, откако претходно Никола Груевски ја поднесе својата неотповиклива оставка.
Во образложението до членовите на ЦК, Груевски истакнал дека без разлика на фактот што анализите за изборните резултати се во тек, оставката ја поднесува како морален чин, бидејќи е природно човекот во кој сите имаат најголема доверба врз себе да ја преземе одговорноста за поразот и покрај сите фактори кои влијаеле.
„Груевски потенцираше дека овие избори беа едни од најнерегуларните каде што имаше еклатантни примери на притисоци, уцени, поткуп и заплашување, но исто така и разочараност меѓу дел од традиционалните гласачи на ВМРО-ДПМНЕ. Токму заради детектирање и корегирање на сите слабости, Груевски нагласи дека мора да се земе сериозно деталната анализа на изборниот резултат. Груевски побара од членовите на ЦК да биде изгласан терминот за вонреден Конгрес и да биде избран нов претседател и раководство кое ќе ја врати ВМРО-ДПМНЕ на власт“, пишува во соопштението од партијата.
Во дел од дискусиите било побарано да се расправа и да се гласа за оставката на Груевски. Со оглед на тоа што таква расправа не била предвидена во правните акти на партијата, на гласање се ставил предлог барањето за организирање на вонреден конгрес.
ЦК на ВМРО-ДПМНЕ дискутирал и за актуелната политичка состојба и најостро го осудил политичкиот прогон и монтираните обвиненија за измислен тероризам против пратеници, уметници, глумци, режисери и полициски службеници и генерално политички прогон на функционери и членови на ВМРО-ДПМНЕ. ЦК комитет на ВМРО-ДПМНЕ заклучил дека сите притворени мора безусловно да бидат ослободени и конструираните обвиненија против нив да бидат повлечени, бидејќи ваквата политика на хунтата на власт оди на штета на државата и граѓаните и дополнително ги зоврива и продлабочува кризата.