Ново рочиште за предметот на СЈО „Насилство во Центар“ денеска треба да се одржи во Кривичниот суд.
Досега двајца признаа вина за настаните пред општина Центар во јуни 2013- четвртообвинетиот Томислав Лазаров и петообвинетиот Јордан Ристевски, кои се осудени на по шест месеци условна казна и најавија дека нема да се жалат на првостепената пресуда.
Во овој предмет обвинети се уште 12 лица, меѓу кои лидерот на ВМРО-ДПМНЕ Никола Груевски, поранешниот министер за транспорт и врски Миле Јанакиески и пратеничката на ВМРО-ДПМНЕ Даниела Рангелова.
Денеска се очекува сведочење на поранешниот градоначалник, Андреј Жерновски, кој за време на протестите пред Општината, добиваше закани од демонстрантите.
На минатото рочиште на 29 ноември, тројцата обвинети Даниел Трифуновски, Дарко Стојчевски и Трајче Петковски побараа да се одложи рочиштето, бидејќи не им бил тука бранителот. Адвокатот Дончо Наков е во Кина за што го известил судот.
-Груевски доцнеше 19 минути и 35 секунди на судењето, а Даниел Трифуновски 17 минути. Барам обвинетите да го почитуваат судот и обвинетите и за следното рочиште, доколку кој било задоцни, да бидат преземени сите процесни мерки. Судењата се познати однапред, рече обвинителката на СЈО, Фатиме Фетаи.
СЈО сепак се согласи да биде одложена главна расправа, но Фетаи рече дека ова е „прв и последен пат СЈО ќе прифати одложување на главна расправа поради отсуство на бранител“.
Тие се обвинети од СЈО за поттикнување на насилството што се случи при протестите пред општина Центар во јуни 2013 година.
Апелацискиот суд ја прифати жалбата на СЈО и одлучи дека во доказната постапка може да се користат снимките од прислушуваните разговори.