Екс премиерот Никола Груевски денеска обвини дека самото СЈО признало дека прислушуваните разговори или таканаречените бомби, кои тие ги користат како доказ во сите предмети можеле да се менуваат или монтираат.
-Имаше еден фрапантен момент, односно самата обвинителка кажа дека постои можност снимките да се менуваат, односно во нив да се уфрлаат делови. Тие не можат да бидат доказ, ова убаво го знаат и апелациските судови, но под притисок на власта донесоа одлука истите да се користат како докази. Познато е дека СЈО овие снимки ги доби од Зоран Заев, па затоа многу е веројатно истите и претходно да биле монтирани. Сето ова е еден политички прогон, изјави Груевски, по завршувањето на рочиштето, за случајот „Траекторија“ каде што се предложени 315 „бомби“ и смс пораки како докази.
Неговата изјава се однесуваше на она што на рочиштето го кажа обвинителката од СЈО Лиле Стефанова дека обвинетите досега не ги добиле овие материјали поради страв од нивна злоупотреба, односно како што рече, од нивно размножување или менување.
Ова беше одговрот на Стефанова на барањето на одбраната на обвинетите да се одложи главната расправа бидејќи не ги добиле доказите.
Груевски исто така реагираше дека за него и за останатите обвинети во случаите на СЈО се закажувале дури по две рочишта на ден, а додека за премиерот Зоран Заев, рочиштето за случајот „Поткуп“ се одложува со месеци.
-Очигледно дека станува збор за селективна правда бидејќи за нас има по две рочишта на ден и тоа се со цел по цел ден да не држат во судница и со тенденција што е можно побрзо да не осудат, а рочиштата на Заев се одлагаат до бескрај, рече тој.
Груевски, Пешевски, Јанакиески и Георгиевски се товарат дека во втората половина на 2012 година и во текот на 2013 година презеле повеќе дејствија со кои во постапката за избор на компанија за изградба на автопатните делници Миладиновци – Штип и Кичево – Охрид ги пречекориле своите овластувања. Со тоа тие нанеле штета на државниот буџет од најмалку 155.117.172 евра, а на компанијата изведувач и овозможиле да се стекне со имотна корист. Предметот стана познат како „кинески провизии“.
Рочиштето е закажано за 26 декември.