Груевски има заштеди од околу 230,000 евра, а пријавил и нови осум уметнички слики. Од нив 180,000 ги заштедил додека бил премиер. Најмногу пари штедел во 2014 година или по 10,000 евра месечно.
Антикорупциската комисија денеска ги објави имотните листови на новите пратеници во Парламентот. Анкетниот лист на поранешниот премиер, Никола Груевски, сега повторно е ставен на отчет на јавноста. На интернет страната на Антикорупциската комисија достапни се имотните листови само на актуелни функционери.
Неговиот анкетен лист беше отстранет веднаш откако си поднесе оставка од функцијата, во јануари 2016 година, а тогашниот претседател на комисијата, Горан Миленков, не сакаше да им открие на новинарите со колкав имот заминал Груевски по десетгодишно владеење. Но, под силен притисок, тој одржа специјална прес конференција за имотната состојба на екс премиерот и рече: „Да го затвориме ова прашање, за век и векова. Амин“.
Според најновата имотна состојба, која што ја пријавил Груевски, тој нема недвижен имот, туку само пари и уметнички слики. Ако се соберат парите од сите сметки, Груевски има 48.265 евра, 7318 швајцарски франци, 250 долари, 600 британски фунти и 10036572 денари ( 163.196 евра). Од нив 8.000 евра се на име на неговата сопруга, Боркица.
Никола Груевски, најдолговечниот премиер во Македонија, нема недвижен имот на негово име, ниту на име на сопругата. Во имотниот лист тој пријавил само дека поседува 33 уметнички слики во вредност од 10.975 евра. Нема заеми и нема кредити.
Груевски на функцијата претседател на Владата стапува со имот од 43.000 евра, а медиумите тогаш го опишуваа како најсиромашниот човек во Владата. Пред помалку од една година опозицијата пресмета дека само во 2015 година Груевски заштедил 118 илјади евра или секој месец тргал настрана по речиси 10,000 евра.
На Груевски му е зголемен и бројот на уметнички слики – сега има 33, а во 2015 имал 25.
И натаму останува непознато на чие име е станот или становите на улицата „Павел Шатев“ во Скопје во кој живее. Опозицискиот СДСМ во 2011-та откри дека на името на мајката на премиерот Надежда Груевска има четири стана. Но, тогашниот состав на Антикорупциската комисија немаше начин како да истражува, затоа што Груевски престанал да живее во заедница со родителот и со тоа автоматски немал обврска да ги пријави становите на мајка му.
Во објавените аудио материјали од нелегалното прислушување, според тврдењето на опозицијата Груевски наводно, сакал на Водно да купи имот вреден 17 милиони евра.
Груевски: Тоа ми е многу итно да знаеш. Дури и поитно од ова.
Јанакиески: Добро.
Груевски: Тоа е многу поголемо, тоа го начекав за џабалак, ти кажав.
Јанакиески: Знам, знам.
Но, за овој разговор меѓу Груевски и екс министерот Јанакиески, засега ни Јавниот обвинител, Марко Зврлевски, ниту Специјалната јавна обвинителка, Катица Јанева, нема отворено предмет.