Македонската машка ракометна репрезентација доби група по мерка за Европското првенство во 2020 година (10 – 26 јануари), прво со 24 репрезентации. „Црвено-жолтите“ ќе играат во групата Б во Виена против селекциите на Австрија, на Чешка и на Украина.
Групата А го доби прекарот балканска. Три тима од просторите од поранешна Југославија (Хрватска, Србија и Црна Гора) плус Белорусија ќе бркаат место во главната фаза низ пресметките во Грац.
Последните два шампиона на стариот континент, Германија (ЕП 2016) и Шпанија (ЕП 2018) ќе играат во групата Ц во Трондхајм заедно со Летонија и Холандија. Во Трондхајм ќе биде лоцирана и групата Д во која се селекциите на Норвешка, Франција, БиХ и Португалија.
Ждрепката во Виена го спои Данска, Унгарија, Исланд и Русија во групата Е во Малме, а во групата Ф во Гетеборг ќе понуди пресметки на Шведска, Словенија, Полска и Швајцарија.
Двете најдобри репрезентации од секоја група ќе продолжат во главната фаза (две групи по шест тима) што ќе се одигра во Виена и во Малме. Ако меѓу нив бидат и „црвено-жолтите“, тогаш ќе останат во австриската пресолнина.
Завршниот викенд на ЕП 2020 е планиран во „Теле2 арена“ во Стокхолм, што впрочем е фудбалски стадион со капацитет од 22.000 седишта.
Кодомаќини на ЕП 2020 се Австрија, Шведска и Норвешка, шампионатот ќе почне на 10 јануари и ќе трае до 26 јануари.
Европско првенство во ракомет (м) – 2020 година
Група А (Грац): Хрватска, Белорусија, Црна Гора, Србија
Група Б (Виена): С. Македонија, Австрија, Чешка, Украина
Група Ц (Трондхајм): Шпанија, Германија, Летонија, Холандија
Група Д (Трондхајм): Франција, Норвешка, Португалија, БиХ
Група Е (Малме): Данска, Унгарија, Исланд, Русија
Група Ф (Гетеборг): Шведска, Словенија, Швајцарија, Полска