Регулаторната комисија за енергетика и водни услуги направи промени во правилникот за формирање цени на нафтени деривати, конкретно во делот на густината на нафтените деривати, кои влијаат неповолно врз работата на компаниите кои се занимаваат со трговија со нафтени деривати и горива за транспорт, реагираат од „Гулф Оил“.
Честите промени во стандардите и во работењето, велат од компанијата, го дестабилизира пазарот на нафта и нафтени деривати, спротивно на напорите на компаниите да го либерализираат и стабилизираат целосно.
Последната промена за новите густини на нафтените деривати и горива за транспорт кои се основа за сите давачки кои произлегуваат од купопродажбата и транспортот на горивата, според „Гулф Оил“, ги присилуваат нафтените компании да работат во загуба, особено во делот со малопродажба. Посочени беа и примери за успешно функционирање од други земји во регионот.
Од „Гулф Оил“ апелираат да се разгледаат последните одлуки и да се донесе квалитетно решение со заедничка соработка, бидејќи на крајот најголемата штета ќе биде направена врз граѓаните на Република Северна Македонија.