Пеп Гвардиола ја комплетира, финансиски, највредната одбрана на сите времиња. Манчестер сити денеска го официјализира трансферот на Бенјамин Менди од Монако кој потпиша договор на пет години. За неговите услуги на сметката на клубот од Кнежевството ќе легнат 48,88 милиони фунти што Французинот го прават најскап дефанзивец во историјата на фудбалската игра.
„Воодушевен сум од доаѓањето во Сити. Ова е еден од најдобрите клубови во Европа со Пеп Гвардиола како менаџер кој сака офанзивен фудбал. Сигурен сум дека ќе бидеме успешни во наредните сезони“, рече Менди по промоцијата во Манчестер сити.
Менди е шестата исполнета желба на Гвардиола во летниот преоден рок. Пред францускиот дефанзивец на „Етихад“ пристигнаа и Кајл Вокер од Тотенхем за 43,35 милиони фунти, Бернардо Силва од Монако за 42,5 милиона фунти, Едерсон од Бенфика за 34 милиони фунти, Данило од Реал Мадрид за 25,5 милиони фунти и Даглас Луис од Васко де Гама за 10,20 милиони фунти. Или сите заедно чинат преку 200 милиони.
„Менди ги поседува сите квалитети што ги бараме од еден бек. Млад е, а веќе има огромно искуство во врвниот фудбал. Важи за еден од најдобрите играчи на таа позиција во светот. Презадоволни сме што е меѓу нас и сигурни сме дека ќе се потврди како одлично засилување за нашиот тим“, истакна Чики Бегиристан, спортски директор на „граѓаните“.
Во меѓувреме, клубот го напуштија неколку играчи меѓу кои Александар Коларов (Рома), Нолито (Севилја), Џо Харт (Вест Хем), Вили Кабалеро (Челзи), Гаел Клиши (Истанбул Басакшехир), Пабло Забалета (Вест Хем), Хезус Навас (слободен фудбалер), Бакари Сања (слободен фудбалер).