Луис Хамилтон ја освои петтата титула во Формула 1 шампионатот со што се израмни со легендарниот Аргентинец Мануел Фанџо. Британецот во болидот на Мерцедес заврши како четврти во трката за ГН на Мексико што беше доволно и математички да се одржи на врвот во генералниот пласман на две трки до крај на сезоната.
„Чувството е чудно. Ја освоив титулата што, сепак, не ја осигурав во Мексико туку со напорна работа низ целата сезона. Со Мерцедес сум поврзан од мојата 13 година. Фанџо, кој ужива статус на легенда, исто така освојуваше титули со Мерцедес. Сето ова што се случува е нестварно“, порача Хамилтон по настапот во Мексико.
Рекордер по бројот на освоени Ф1 титули и натаму е Германецот Михаел Шумахер со седум. Хамилтон има две помалку, откако претходно победуваше во 2008 година, во 2014 година, во 2015 година и во 2017 година. Во Мексико не беше конкурентен поради пневматиците и се соочи со проблеми да остане во трката што на крајот му припадна на Макс Ферстапен.
„Трката беше тешка. Добро почнав меѓутоа подоцна не знам што се случи и важно ми беше само да завршам. Сакам да се заблагодарам на семејството, на најблиските, посебно на татко ми и екипата без чија поддршка немаше да успеам во ова“, додаде Хамилтон.
Честитки до британскиот возач на Мерцедес упати и Себастијан Фетел од Ферери, неговиот најголем ривал за титулата. Германецот притоа призна дека Хамилтон бил подобар пилот од него во оваа година.
„Трипати во животот имав ваков вид на разочарување кога еден ден сфаќате дека не можете до титулата. Таквите денови не се среќни. Тоа беше случај и во 2009 година и лани. Како екипа имавме свои прилики, но на крај се покажа дека не бевме доволно добри. Луис возеше извонредно низ цела 2018 година. Му реков дека ја заслужи титулата, да ужива во неа и да продолжи во ист стил и наредната сезона, а јас ќе се обидам да дадам максимум. Петти трофеј, мислам дека е нешто неверојатно“, изјави Фетел.
До крај на сезоната во Формула 1 шампионатот преостануваат уште две трки. Претпоследната ќе се вози за ГН на Бразил (9-11 ноември), завесата ќе се спушти во Абу Даби (23-25 ноември). Луис Хамилтон е лидер со 358 бода пред Себастијан Фетел на второто место со 294 бода и неговиот клупски колега, Кими Раиконен на третото со 236 бода.