Комесарот за европска соседска политика и преговори за проширување на Европската комисија Јоханес Хан утре ќе пристигне во Македонија, со што почнува скрининг- процесот на земјата за отпочнување преговори за членство во Унијата.
Според агендата, Хан изутрина ќе има средба со премиерот Зоран Заев, а потоа и со претседателот на Парламентот Талат Џафери и со лидерот на опозициската партија ВМРО-ДПМНЕ Христијан Мицкоски. Еврокомесарот Хан ќе има обраќање пред членовите на Националниот совет за евроинтеграции во Собранието.
Минатата недела Хан на прес-конференција во Брисел ги најави посетите на Македонија и на Албанија и отпочнувањето на скрининг процесот на овие две земји. Еврокомесарот по завршување на средбите во Скопје, утре попладне ќе замине за Тирана.
Премиерот Зоран Заев во петокот на средбата со претставници на граѓанските организации изјави дека со доаѓањето на Хан во Скопје почнува скрининг процесот.
– Целта е на владина сесија да ги отвориме процесите, а тоа значи дека час поскоро треба да ја подготвиме државата и со преговарачката рамка и со преговарачките тимови за процесот за кој е многу важно колку време ќе потрошиме, рече Заев.
Додаде дека од 33-те поглавја за Македонија, ќе треба да има и 33 работни групи во кои ќе треба да се вклучат претставници и од институците и од граѓанскиот сектор.
Во однос на референдумот уште еднаш изрази уверување дека тој ќе биде успешен и оти неделава ќе се прецизираат прашањата околу тоа кога ќе биде референдумот, дали тој ќе биде обврзувачки или консултативен и како ќе биде формулирано референдумското прашање. Најави дека ќе побара опозицијата и сите политички чинители да ги расчисат своите позиции во делот на референдумот.
Посетата на Хан следува по одлуката на Европскиот совет за почеток на преговори со Македонија и со Албанија, на самитот на крајот на јуни.
Советот на ЕУ на ниво на министри препорача отворање на преговори за членство со Македонија и со Албанија во јуни 2019, но двете земји до отворањето на преговорите ќе треба да постигнат напредок во реформите.
Ова е добра недела за вашата земја и за Западен Балкан, министрите за надворешни работи на ЕУ го отворија патот за отпочнување преговори за членство за Македонија и Албанија во јуни 2019 година и за неколку часа очекувам шефовите на влади на ЕУ да ја потврдат одлуката, изјави денеска прес-конференција
Еврокомесарот Хан изјави дека подготовките за скрининг процесот ги почнува веднаш.
Вицепремиерот за евроинтеграции Бујар Османи тогаш ја најави посетата на Хан, истакнувајќи дека првите денови од скринингот е всушност објаснувачки.