Еврокомесарот Јоханес Хан денеска во Скопје и формално го означи почетокот на подготвителните активности за скрининг процесот, клучен за почеток на пристапните преговори со ЕУ.
Тој појасни дека скринингот опфаќа темелни активности што ги спроведува Комисијата и тие се подеднакви за сите земји кандидатки.
Хан посочи дека ова е резултат на минатомесечната Спогодба на Македонија и Грција со која се затвори билатералниот спор за името долг 27 години, за кој рече дека има огромна меѓународна поддршка, бидејќи е важна за мирот и стабилноста не само на регионот туку и на цела Европа.
-Но сега вам ви останува, на граѓаните да одлучите на слободен и суверен начин за иднината на оваа земја. Вратата на ЕУ сега е ширум отворена, вам ви останува да ја искористите оваа можност, рече Хан кој во оваа прилика упати апел до граѓаните да учествуваат на референдумот за ова прашање.
Тој овој повик особено го насочи кон младите, и притоа го посочи примерот на Велика Британија и референдумот за Брегзит, каде како што рече, неучеството на младите, доведе до ваков исход.
-Народот во оваа држава покажа отпор и издржливост и сте пример во регионот за да си ги решат своите билатерални проблеми и сте модел за сите во регионот. Постигнавте нешто што претходно беше невозможно и недостижно, рече Хан на заедничката прес конференција со премиерот Зоран Заев.
Заев истакна дека ова е историски ден за Македонија, што земјата го очекува уште од 2009 година.
Тој истакна дека на седницата на Владата која се одржа пред прес конференцијата, еврокомесарот Хан го претставл начелниот план за текот за скринингот, а Владата донела неколку заклучоци за почеток на процесот.
За шеф на преговорите и главен политички преговарач е назначен вицепремиерот за евроинтеграции Бујар Османи, а задолжен за техничкиот дел од процесот ќе биде советникот на премиерот Бојан Маричиќ.