Кандитатот за премиер на Косово, Рамуш Харадинај, денеска во текот на неформална средба со претседателот на Косово, Хашим Тачи, дал гаранции дека има доволен број на гласови да биде избран за премиер.
Тој по средбата со Тачи рече дека немало договор за датумот за одржување на конститутивната седница на Собранието на Косово, јавува ТВ Клан.
Харадинај е кандидат на коалицијата Демократска партија на Косово, Алијанса за иднината на Косово и на Иницијативата за Косово.
Медиумите во Приштина јавија дека Тачи денес или утре ќе донесе одлука за датумот за свикување на конститутивна седница врз основа на резултатите од предвремените парламентарни избори одржани на 11 јуни.
Локалните медиуми јавуваат дека новата влада можно е да се избере на 18 јули, а до одложување дошло бидејќи поголем дел од новоизбраните пратеници се на одмор надвор од Косово.
За изгласување на претседател на собранието потребни се 61 глас од 120 пратеници. Исто толку се потребни и за формирање на новата косовска влада.