По повод одбележувањето на 8. април Меѓународниот ден на Ромите Хелсиншкиот комитет за човекови права на РМ ја истакнува загриженоста поради неимплементирањето на активностите од важечката Стратегија за Ромите во Република Македонија (2014-2020) и ја повикува државата декларативните заложби за подобрување на статусот на Ромите да ги преточи во конкретни акциски планови и афирмативни мерки за подобрување на статусот и интеграција на Ромите во сите општествени сфери.
– Имајќи предвид дека се уште постои системска дискриминација кон Ромите, особено во постапувањето на полициските службеници кон Ромите на граничните премини, непристапноста на жените Ромки до здравствена заштита и гинеколошки услуги и сегрегацијата на децата Роми, ја повикуваме државата да преземе активни мерки за спречувањето на дискриминацијата врз основа на етничка припадност и маргинализирана група, се наведува во соопштението.
Организацијата посебно е загрижена, за како што вели „системската сегрегација на децата Роми во образовниот процес, кои без никаква категоризација посетуваат училишта за деца со интелектуална попреченост или пак се распределени во посебни паралелки во редовните училишта, наместо да бидат вклучени и интегрирани во редовните паралелки“.
Хелсиншкиот комитет вели дека ќе продолжи да работи на заштита и унапредување на правата и слободите на припадниците на ромската заедница преку низа активности, а најдиректно преку имплементација на проектот “Следење и известување за прекршувањата на правата на Ромите”, финансиски поддржан од Амбасадата на Сојузна Република Германија.
– Меѓународниот ден на Ромите, придонесува за подигнување на свесноста и потсетува на долгогодишната борба за подобар и подостоинствен живот на оваа група луѓе. Ромите во Македонија се најранлива етничка заедница, која се соочува со дискриминација во речиси сите сфери на општественото делување, се истакнува во соопштението.