Едногодишно бебе беше „безмилосно и намерно“ убиено во напад со руски беспилотни летала во јужна Украина пред три дена, соопштија украинските власти. Жителите велат дека се чувствуваат како мети во болна игра на „човечко сафари“.
Бебето, идентификувано како Дмитрик, си играло во дворот на неговата баба во селото Правдине кога дронот удрил во близина, гранатите му го прободеле срцето и го убиле. Дмитрик го прославил својот роденден само два месеци претходно.
„Нашето мало дете беше тука, во оградената област, шетајќи наоколу“, изјави бабата на бебето, 64-годишната Халина, за украинскиот медиум „Подробности“.
„Го слушнав ветерот и зуењето на дронот, ја свртев главата и тој леташе право тука“, се присети таа.
„Трчав како луда кон детето. Кога татко му кога го крена во рацете по експлозијата, внучето ми беше мртво“, рече таа низ солзи.
Фотографиите од местото на нападот покажуваат игралиште покриено со стакло и метални парчиња, уништени играчки и разнесена ограда. Кровот на куќата беше оштетен, а влезната врата останала без стакло. Дел од експлозивниот товар од дронот беше пронајден веднаш пред куќата, пренесуваат хрватските медиуми.
„Овие детски играчки што беа разнесени од експлозијата му припаѓаа на Дмитрик“, изјави за „Телеграф“ високиот украински воен функционер Олександр Прокудин.
Инаку и Русија и Украина користат дронови од прво лице ФВП (FPV), кои ги пилотираат војници кои гледаат снимки од дронови во живо, а потоа фрлаат бомби или се уриваат во цел и експлодираат. Русија ги користи овие дронови за тероризирање на цивилите во Херсон, таргетирајќи луѓе на отворено.
Андриј Јермак, советник на претседателот Володимир Зеленски, изјави за „Пост“ дека нападот во кој е убиено момчето не бил случаен. ФВП дроновите им обезбедуваат на операторите јасен поглед на целта, а сликата станува појасна колку што дронот се приближува.