Соперничката на Доналд Трамп на претседателските избори во 2016 година, Хилари Клинтон, даде поддршка за номинација на демократот Џо Бајден за кандидат за претседател на САД на изборите што ќе се одржат кон крајот на оваа година.
Поддршката таа ја изрази на заедничката онлајн средба со Бајден одржана денеска на која дискутираа за ударот и последиците на ковид-19 по жените.
Клинтон, поранешен американски државен секретар, меѓу другото истакна дека имала чест да работи со Бајден повеќе години и забележала дека тој може да ги обединува луѓето.
„Замислете колку ќе прави разлика да имате вистински претседател, а не таков кој глуми претседател на телевизија“, истакна таа, критикувајќи го противникот кој ја победи во 2016 година.
Поддршката на Клинтон доаѓа еден ден откако Бајден беше поддржан и од Ненси Пелоси, водечка демократка и спикар на Претставничкиот дом во американскиот Конгрес.