Енвер Хоџај, шефот на косовската дипломатија денес во Брисел, во Европскиот парламент, изјави дека македонските проблеми не се резултат на влијание од Косово или Албанија:
“Македонското општество е веќе со години поларизирано, помеѓу етничките заедници и помеѓу самите Македонци и тоа нема врска со никакво надворешно влијание од Косово. Гледаме различни пристапи од двете најголеми партии и прашање е колку таму има демократски институции за демократско решение во постизборниот период. Проблемите помеѓу двете најголеми партии не се резултат на мешање од Косово или од Албанија во Македонија.
Но истовремено, ние би сакале да видиме дека албанската заедница, која е големо малцинство – можеби 30 отсто, дека тие треба да бидат дел од јавниот живот во сите негови делови. Во 21 век, заедниците кои имаат 30 отсто жители, да не се користи нивниот јазик на централно ниво треба да биде прашање за кое треба да се разговара и овде во Европскиот парламент. Ние би сакале Албанците да бидат дел од јавниот и економскиот живот и би сакале Македонија да стане дел од НАТО и ЕУ.
Нашите односи со Македонија се одлични и ќе сториме се тие да останат одлични и посилни. И имаме одлична економска соработка со Македонија”, изјави Хоџај во Комитетот за надворешни работи на Европскиот парламент.