Младите демонстранти, про-демократските активисти кои ја организираа Чадор-револуцијата во Хонг Конг во 2014 година, добија шест пратенички места во Парламентот на Хонг Конг (ЛегКо) во избори со историска излезеност на 58% од населението.
Активистите се залагаат за поголема автономија на Хонг Конг и промени во начинот на кој Кина управува со оваа територија.
Сепак, мнозинството во Парламентот го сочинуваат поддржувачите на Кина.
Според 23-годишниот Нејтан Ло, еден од лидерите на протестите кој е избран во Парламентот, ова е знак дека луѓето сакаат промена.
Ова се први избори во Хонг Конг по протестите во 2014 година, кога младите демонстрантите ги барикадираа централните подрачја неколку недели.
Партијата на Ло, Демосисто, бара право на самодекларација а на изборите го имаше вториот највисок број на гласови.
Но неговата главна порака по изборите е упатена до про-демократските законодавци. Тој вели тие мора да бидат обедените во борбата против кинеската Комунистичк партија.
Она што е важно е дека новиот млад парламентарец и неговите сојузници задржаа една третина од местата во Парламентот, што значи дека тие имаат можност да стават вето на поголемите уставни промени.
Иако на изборите не се избира шеф на Владата, според аналитичарите, ваквата разврска може да има сериозно влијание во однос на тоа дали Кина ќе го поддржи сегашниот лидер Сај Ленг за втор мандат.