Со поддршка од 376 делегати, 40-годишниот Христијан Мицковски е новиот претседател на ВМРО-ДПМНЕ.
Oд вкупно 438 делегати на 16.вонреден конгрес на ВМРО-ДПМНЕ, 376 делегати гласале „за“, а имало 52 неважечки ливчиња.
По изборот, Мицкоски рече дека неговата визија е држава на народот, за народот и отворена, рамноправна, силна и просперитетна.
„Македонија мора да оди напред, да стане земја членка на ЕУ и НАТО, но потребна е реална волја, структурни и реални реформи, преку професионални кадри кои ќе го подобрат живеењето на граѓаните. Корупцијата, политичките притисоци, политичката одмазда…мора да стане минато. Македонија мора да има брз и ефикасен правосуден систем, а не уценет и зависен каков што е сега. Оние кои ја делат правдата мора да бидат независни и непристрасни. Мора да растат платите на граѓаните, клучот е во развојот на економијата“, порача Мицкоски по неговиот избор за претседател на ВМРО-ДПМНЕ.
Овој конгрес на партијата помина во сериозни поделби во партијата, каде што актуелни и поранешни пратеници, поранешни министри покренаа иницијатива за одлагање на конгресот, повеќе време за негово организирање и демократизација на постапката за кандидирање.
Претседателот во оставка Никола Груевски ја одби оваа иницијатива и на конгресот рече дека е изненаден од поделбите предизвикани од неговите најблиски соработници.
Мицкоски е доктор по технички науки-машинство, вонреден професор на Машинскиот факултет во Скопје.
Беше претседател на управниот одбор и генерален директор на АД ЕЛЕМ. Магистрирал и докторирал на универзитети во Германија и Италија.