Денешните протести против аболицијата на политичарите донесена од страна на претседателот Ѓорѓе Иванов, седми по ред, поминаа во мирна атмосфера без тензии помеѓу демонстрантите и полицијата.
Како и вообичаено, протестите започнаа пред седиштето на Специјалното јавно обвинителство каде повторно и се даде поддршка на институцијата која е создадена со Договорот од Пржино а која има за цел да ги расчисти индициите за криминал кои произлегоа од нелегално прислушуваните материјали.
Оттаму демонстрантите се упатија кон Собранието на Република Македонија каде овој пат, за разлика од претходните протести не беше блокирано од припадниците на безбедносните сили. Полицајците беа поставени со метални барикади само во дворот на Законодавниот дом.
Од овде на разглас зборуваа дел од учесниците на протестот кој порачаа дека откако ќе се промени ситуацијата „и ќе се смени режимот“, фасадите од градбите од Скопје 2014 проектот на екс-премиерот Никола Груевски ќе бидат изгребани, а останатиот материјал однесен во затворот во Идризово, каде што овие демонстранти, како што велат, бараат да завршат криминалците од власта.
На боите на Триумфалната капија беа додадени уште неколку бои а на нив демонстрантите испишаа „Ова кошта 208 Тамари“, мислејќи на починатата Тамара од Велес чии живот заврши во лавиринтите на здравствените институции во државава.
Оттука демонстрантите се упатија кон Градскиот плоштад а потоа се упатија во неколку разни насоки по кои следната дестинација за искажување на револтот беше Министерството за култура. Пред оваа институција, за разлика од другите, немаше полициско обезбедување се до моментот кога демонстрантите почнаа да „го фарбаат“ со боја седиштето на Министерството со кое раководи Елизабета Канческа-Милеска.
Протестот како и вообичаено продолжи пред Владата на Република Македонија. „Готово е Никола“, „No pasaran“, „Оставка“ беа постојани извици на револтираните, а македонското и албанското знаме сплотени во една порачаа дека немаат намера да отстапат од своите барања.
Нивните барања се оставка од Ѓорѓе Иванов, оставка од целата Влада, преместување на изборите закажани за 5.јуни и формирање на специјално одделение на Кривичниот суд, кое ќе биде надлежно за случаите под јурисдикција на СЈО.