Алина Кабаева, жената за која се смета дека е во љубовна врска со рускиот претседател Владимир Путин, е на листата во најновиот пакет санкции на ЕУ против Москва, тврдат двајца европски дипломатски извори. Во оваа фаза имињата може да се отстранат или додадат според дискреционото право на земјите – членки, вели извор од Европската комисија. ЕУ официјално сеуште не го потпиша предлогот, но тоа може да го направи денеска на состанокот на амбасадорите на ЕУ – кој во моментов се одржува во Брисел.

„Разговорите се во тек. Прашањето околу целиот пакет санкции не е едноставно и треба да почекаме и да видиме“, изјави еден од дипломатските извори.

Кабаева првпат беше поврзана со Путин пред повеќе од една деценија, додека беше гимнастичарка со медали. Путин негираше дека има врска со неа. Во април, Волстрит журнал објави дека американските власти дебатирале дали да воведат санкции или не на Кабаева поради загриженоста дека потегот може уште повеќе да ги ескалира тензиите бидејќи може да се смета како екстремен личен удар за Путин.

Поглаварот на Руската православна црква, патријархот Кирил, исто така е меѓу поединците кои се вклучени во предложената шеста рунда санкции на ЕУ, според два извори кои ги виделе целосните документи.