Ситуацијата со епидемијата во земјата во моментот е драматична. Тоа бара и бројни вонредни мерки. Македонската влада, во рамки на справувањето со Ковид-19, сега ги удри по џебот и политичките партии, пишува „Дојче Веле“.
Македонската влада синоќа одлучи дека четири милиони евра од Буџетот наменети за финансирање на партиите, ќе ги употреби за борба со последиците од пандемијата со Ковид-19.
Тоа е околу четири петини од предвидените пари во државниот буџет за 2020 година за финансирање на парламентарните политички партии.
Владата во Скопје на предлог на министерството за правда донесе уредба со законска сила, со која значителен дел од парите ќе се пренаменат за борба со последиците од Ковид-19, наместо да бидат исплатени на партиите.
Според оваа уредба, парламентарните политички партии од буџетот за финансирање ќе добијат само 0,04 отсто, наместо 0,15 насто.
„Ако требаше на партиите да им бидат исплатени 320 милиони денари, со оваа уредба со законска сила на партиите во 2020 година треба да им се исплатат вкупно 71.480.556 милион денари. Изразено во евра, околу 4 милиони евра ќе бидат пренаменети во буџетот за борба со последиците од пандемијата, а за политичките пратии останува малку повеќе од еден милион евра, кои ќе бидат распоредени во согласност со законските процеси“, наведе Министерството за правда.
Инаку во јуни епидемијата во земјата доби драматиччни димензии. Бројот на досега дијагностицирани случаи на Ковид-19 се приближува до бројката од 5.000 а директно или индиректно од болеста починаа 222 лица. Активни случаи има 2.735 со околу 40 кластери ширум земјата, од кои најголем број се во главниот град.
