Претседателот на Владата Димитар Ковачевски ќе ја предводи владината делегација на седмиот „Делфи економски форум” во Грција.
Во рамки на Форумот во различни денови учествуваат и вицепремиерот за економски прашања и координација на економските ресори Фатмир Битиќи, како и министрите за надворешни работи Бујар Османи, за финансии Фатмир Бесими, за економија Крешник Бектеши, за одбрана Славјанка Петровска и министерот за животна средина Насер Нуредини.
„Делфи економскиот форум” се одржува од 6 до 9 април и е под покровителство на претседателката на Грција, Катерина Сакеларопулу.
Во рамки на посетата на Грција, премиерот Ковачевски ќе оствари средби и работни состаноци со лидери и истакнати политичари во светски рамки.
Организаторите на настанот информираат дека целта е да се покријат сите теми, а оваа година поради војната, голем дел ќе биде посветена на Украина, но и на геополитичките предизвици.
На седмиот „Делфи економскиот форум” насловен „New Realities” потврдени се скоро 800 говорници од над 36 земји, а ќе бидат опфатени низа теми, како што се светската безбедност, глобалната економија, климатските промени, иднината на ЕУ, технологијата, здравството, општеството и културата. (С.К.)