И покрај енергетската криза, некои семејства се уште прават за 100 проценти повисоки сметки за електрична енергија, што укажува на копање криптовалути, беше објавено денес по седницата на Советот за безбедност во прилог на информацијата дека струјата треба да се штеди. Премиерот Ковачевски ги повика копачите на криптовалути да престанат да ја злоупотребуваат субвенционираната електрична енергија. На прашањето зошто не се прогласи копањето криптовалути за незаконско, Ковачевски рече дека за тоа ќе треба да се донесе законска регулатива.
Денешната седница на Советот за безбедност што ја свика шефот на државата Стево Пендаровски, се одржа во знакот на надоаѓачката криза за електрична енергија и суровините за нејзино производство, при што во изјавата по седницата премиерот Димитар Ковачевски порача дека Владата ги презема сите мерки за да се преброди претстојната зима. Тоа ќе биде најтешка зима во поновата историја на светот, рече тој.
„Владата побара од ЕСМ да го зголеми производството на електрична енергија за 25 проценти. Извршувањето на таа задача ќе го следиме секојдневно. Во најтешкиот период за нас кој почнува на 1 октомври и ќе трае до април идната година или и до летото, на сите граѓани и на малиот бизнис, ќе им обезбедиме најниска можна цена на електрична и топлинска енергија, по сегашната цена, со задржување на ефтина струја и 24 часовна достапност на електрична енергија без рестрикции“, рече Ковачевски.
Сепак, премиерот на прашање подоцна најави дека е можно зголемување на цената на струјата од почетокот на идната година, но рече дека Владата ќе стори се за да се ублажи ценовниот шок.
И малите и средните фирми ќе користат електрична енергија по цена која е далеку пониска од берзанските цени, рече Ковачевски. Тој подвлече дека цената на електричната енергија за домаќинствата и за малите и средни претпријатија е субвенционирана од Владата во износ од 80 проценти и нагласи дека доколку не е таа буџетска субвенција сметките на граѓаните ќе бидат пет пати повисоки.
За Скопје премиерот упати порака дека ЕСМ е во фаза на преземање на БЕГ бидејќи скопската власт одбила да ја преземе оваа комунална дејност што е во нејзина надлежност, и дека сите 55 илјади домаќинства ќе добиваат топлинска енергија за нивните домови кои се греат на парно греење.
Ковачевски информираше и дека е обезбеден јаглен и мазут за РЕК Битола, ТЕЦ Неготино и РЕК Осломеј, но дека може во текот на зимата да дојде до непредвидени испади на дотраената и стара опрема која е во функција 40-50 години. Тој исто така навести и можни проблеми со транспортот бидејќи сите држави се во трка за енергетски набавки.
Премиерот ситуацијата што претстои ја нарече „ужасна“. Додаде дека Владата веќе прави енергетски план за следната пролет. „Бараме штедење на електрична енергија од сите граѓани, а владата ќе биде пример за тоа со планот кој важи од 1 септември“, рече Ковачевски.
Тој рече и дека соработката со соседите ќе биде многу важна бидејќи Бугарија произведува базна енергија за целиот регион а Грција е логистички центар на таа дејност и притоа ја пренесе подготвеноста на Софија, каде вчера беше на разговори, да ни помага во пребродувањето на зимата. Помошта ќе биде насочена кон електричната енергија за стопанството кое ја набавува на слободен пазар каде цената е во постојан пораст.
Бројките говорат дека покрај домаќинствата, субвенционирана цена на струја користат и околу 72 илјади мали фирми со до 50 вработени.
На слободен пазар се 1350 приватни компании и 350-400 институции, за кои Владата ќе се грижи да добиваат струја по цена пониска од берзанската, за да можат да преживеат. „Меѓу нив се и компании кои произведуваат храна“, рече Ковачевски.
Планот за справување со енергетската криза „тежи“ околу 300 милиони евра за наредните два квартали. (С.К.)