Полска би можела да ја разгледа можноста за забрана за употреба на производите на кинеската компанија „Хуавеј“ во државните институции, изјави денеска претставникот на полските власти задолжен за безбедноста на Интеренет, Карол Оконски.
Тој истакна дека полската Влада, исто така, може да го заостри и Законот кој ќе им овозможи на властите да ја ограничат достапноста на производите на која било компанија за која сметаат дека претставува закана по безбедноста.
„Ќе извршиме анализа дали нашата одлука би можела да го опфати прекинот на употреба на производите на „Хуавеј“. Немаме правни начини да ги принудиме приватните компании или граѓаните да не ги користат производите на таа компанија. Не може да се отфрли можноста за разгледување на измената на регулативата што ќе ни овозможи сличен чекор“, додаде Оконски.
Оконски нагласи дека, по апсењето на службеникот на „Хуавеј“ поради шпионажа, не е потребно да се преземаат драстични измени на политиката кон кинеската компанија, но дека е можно да се направи ревизија на употребата на производите на „Хуавеј“ во државните институции.