Во пресрет на утрешниот Централен одбор на Социјалдемократите на кој треба да бидат промовирани нови тела како Советот за креирање и имплементација на политики, медиумите и денеска лиферуваат информации за тоа со кои луѓе ќе се опкружи новиот партиски претседател Димитар Ковачевски .
Едно од тие имиња кои од поодамна кружи во јавноста за нова функција во партијата е поранешниот пратеник Игор Ивановски-Шема. За него Телма Тв, напиша дека е поранешен висок партиски функционер, универзитетски професор на скопскиот Економски факултет, со неколку мандати како пратеник, дека бил дел од претседателскиот кабинет на Бранко Црвенковски и дека е од скопското крило на партијата.
Игор Ивановски беше еден од „најгласните“ пратеници на СДСМ, како дел од пратеничката група тој беше исфрлен од Собраниската сала на 24.12.2012, настан познат како црн понеделник кога пратениците на тогашната опозиција беа исфрлени од салата во рамки на дебата за буџетот 2013 година.
Околу екипирањето на новото партиско раководство, за потпретседатели се споменуваат Петар Костадинов градоначалник на Валандово, пратеничката од Битола, Бисера Костадиновска Стојчевска, која при гласањето за кризните корона мерки дојде да гласа во скафандер поради болест од Ковид 19, еден потпретседател треба да даде скопското крило…
Миле Зечевиќ се очекува да биде нов генерален секретар на СДСМ, на местото на досегашниот Љупчо Николовски.
Како што е веќе познато, досега најава дека нема да се дел од новата влада има од министерот за здравство Венко Филипче и од министерката за образование Мила Царовска. Оливер Спасовки , министерот за внатрешни работи , деновиве изјави дека откако ќе проанализира се ќе излезе со своја изјава. Нешто слично одговори и министерот за транспорт и врски Благој Бочварски, на чие место, во јавните комбинаторики се калкулира со името на Петре Шилегов во новата Влада.
Нештата се очекува да бидат појасни претстојните денови, кога претседателот на државата треба да му го предаде мандатот на новиот мандатар за состав на владата а најизвесен во таа позиција е новоизбраниот лидер на СДСМ, Димитар Ковачевски. За негов партиски заменик, досега единствено се лиферува со името на Сања Лукаревска, актуелната директорка на УЈП.
(М.Т.)