Обвинетите за насилствата на 27 април 2017, Јане Ченто и Игор Југ нема да поднесат барање за амнестија.
Во судницата на денешното рочиште Јане Ченто и се обрати на судијката Кацарска и рече: „Имам целосна доверба во вас, време е да покажеме дека сме правна држава и дека судот е независна власт. барање за амнестја нема да поднесам, вие пресудете ми“, рече Ченто.
Тој нагласи дека освен судот никој друг нема право некого да помилува.
,,Сакам правда“, кажа Ченто.
И обвинетиот Игор Југ кажа дека нема да поднесе барање за амнестија.
„Ќе ја докажам правдата пред вас кои сте единствено легитимна да одлучува за нашата невиност“, кажа Југ обраќајки и се на судијката Кацарска.
Судијката Кацарска напомена дека Судскиот совет не одлучува и нема надлежност за амнестијата.
Дополнителни докази предложи одбраната на обвинетите Крсто Мукоски, Митко Чавков, Душко Лазаров, Мунир Пепиќ, Игор Југ и Александар Василевски Нинџа, но судијката Добрила Кацарска кажа дека добила известување од УБК дека доказите на Пепиќ не се декласифицирани, а доказите предложени од Нинџа не се прибавени на законит начин.
Судот денешното рочиште го одложи за одбраната на Митко Чавков да може да се подготви за изведување на предложените докази.
Судијката Добрила Кацарска најави дека Судечкиот совет на утрешното рочиште ќе се произнесе дали ги прифаќа дополнителните докази предложени од обвинетиот Игор Југ, а во однос на околу стотината аудио разговори и фотографии предложени од обвинетиот Александар Василевски Нинџа, рече дека тие не се прибавени на законит начин и судот нема да може да ги прифати како докази.