Игор Тантуровски уште една година ќе биде на чело на Антикорупциската комисија. На денешната седница членовите на комисијата едногласно го избрале Тантуровски повторно за претседател, соопштија од ДКСК.

Претседателот на Државната комисија за спречување на корупцијата се избира од редот на постојните членови на ДКСК, со мандат од една година, со право на уште едно именување.

Игор Тантуровски во 2012 година беше на списокот на донатори на ВМРО-ДПМНЕ со донирани 60.000 денари, но според него тоа не зборува за неговата партиска независност како основен законски предуслов по кој се бираат членовите на Комисијата.

„Тоа е јавно достапен податок и немам што да порекнува. Не знам каде ја гледате поврзаноста со партија, јас не гледам таква поврзаност, можам да се најдам како донатор за било што“, рече Тантуровски при неговиот избор за член на Комисијата.

Кредибилитетот на Антикорупциската комисија секоја година е во слободен пад. Тоа беше заклучокот и на извештајот на МЦМС што го презентираше минатиот месец, според кој десет пати се намалил бројот на пријави кои граѓаните ги поднеле до комисијата од 2006 до 2015 година, што значи дека кај граѓаните се намалува довербата во оваа институција.

Во 2007 година имало 1.114 пријави, додека во 2015 само 127 пријави за корупција поднесени од граѓаните.

Во изминатата година под водство на Тантуровски не е отворен ниту еден случај за корупција на функционери од власта.