Благо опаѓа бројот на нови позитивни, повторно инфицирани и починати од коронавирусот во земјата. Нови 9.982 заразени од ковид-19 сe регистрирани во 35 градови во државата, што е намалување од 16,2 % во однос на претходната недела (n=11.910), повторно се инфицирале 1.340 граѓани или за 14 отсто помалку, а 147 лица починале од ковид-19, што е за 0,7 % помалку во однос на претходната недела, покажува најновиот извештај на Институтот за јавно здравје за периодот 31.01 до 06.02.2022.
Процентот на позитивност во изминатата недела се движел од 22,5% до 35,6%, или просечно 29,5%. Најголем дел од регистрираните случаи се од Скопје (n=5.300; 53,0%), а со коронавирусот најмногу се заразувале во Кавадарци – 1.069,1/100.000.
Тестирани биле вкупно 33.421 материјали во лабораториите во кои се спроведува молекуларно и антигенско тестирање за присуство на SARS-CoV-2, со намалување од 13,2% во однос на минатата недела.
Заболуваат лица во сите возрасни групи, а најзастапени се лицата постари од 60 години (n=2.455, 24,6%) и 30-39г (n=2.004, 20,1%). Најмалку заболени има кај децата до 9 години (n=312; 3,1%), а се намалува и бројот на заболени кај речиси сите возрасни групи, со најзабележително намалување од 23,9% кај возрасната група од 30-39г.
Индексoт на заразност најнизок во Дојран, највисок во Дебар
Во однос на дистрибуцијата по пол, пријавени се 5.357 (53,7%) лица од женски и 4.625 (46,3%) од машки пол.
Согласно новиот алгоритам за оздравување во текот на минатата недела со статус „оздравени“ се стекнало 11.122 лице во хоспитализирани услови или на домашно лекување.
Во текот на минатата недела вкупно се пријавени 1.340 реинфекции, со намалување за 14,0% во однос на претходната недела.
Пријавени се 147 смртни случаи во 24 градови во текот на изминатата недела, за 0,7% помалку во однос на претходната недела. Најголем дел од нив се од Скопје (51). Во однос на возраста, најголем број (n=137; 93,2%) од починатите припаѓаат на возрасната група над 60 години, а регистрирани се починати лица и кај возрасната група од 50-59 години (7), 40-49 години (1) и 30-39 години (2).
Зголемена е инциденцата во 15 градови во државата, а најголемо намалување на инциденцата во последните две недели се забележува во Крушево, Берово, Пробиштип, Демир Хисар, Прилеп и Битола во однос на претходните 2 недели. Репродукцискиот број (R0), односно индексoт на заразност, се движи од 0,43 во Дојран до 1,44 во Дебар.
(Љ.Б.)