Повеќе илјадници луѓе маршираа денеска во Москва во знак на сеќавање на опозицикиот лидер, Борис Немцов, убиен блиску до Кремљ на почетокот на 2015 година, откако го обвини рускиот претседател за покренување на нелегална војна во Украина и најавите дека ќе објави документи кои тоа го докажуваат.
Немцов, тогаш 55 годишен, ликвидиран е од зад грб на 27 февруари 2015 година, кога со украинска девојка доцна навечер се враќаше дома од ресторан. Претходно беше гостин на радиото Ехо Москва, каде зборуваше за војната во Украина, поради што Запад на Русија и наметна санкции што предизвика економска криза во земјата.
Немцов исто така најави дека ќе објави документи за руската вмешаност во судирите во источна Украина.
Полицијата тврди дека се собрале околу 5.000 луѓе, а агенциите АФП и ДПА, повикувајќи се на изјави на организаторот дека марширале 15.000 лица низ Москва.
Демонстрантите носеа знамиња, плакати и изјави на Немцов, меѓу кои: „Војната во Украина е злосторство на Путин“, „Русија без Путин“ .
Политичките сојузници на ликвидираниот Немцов тврдат дека неговото убиство е извршено за да ги заплашат и замолчат.
На годишнината од убиството на Немцов, повик за собир упати опозицискиот активист Владимир Кара-Мурза, кој во странство се опоравува од болест поради која заврши во индуцирана кома. Неговите симптоми речиси се слични на фаталната болест која го погоди во 2015 година и за која верува дека е резултат на намерно труење.
За убиството на Немцов обвинети се петмина Чеченци, на кои судењето им почна во октомври минатата година. Тие ги негираат обвинувањата, а семејството на Немцов верува дека оној кој го наредил убиството никогаш нема да биде откриен.