Новиот сопственик на Твитер, Илон Маск, преку е-пошта ги известил вработените во компанијата да се подготват за „тешките времиња што претстојат“ и дека работата од дома е забранета, освен ако тој лично не го одобри тоа, објави денеска Bloomberg News.

Новите правила, кои стапуваат во сила веднаш, бараат вработените да бидат во канцеларија најмалку 40 часа неделно.

Тој во меилот им пишал на вработените дека нема начин да се разубави сликата за економската иднина на Твитер или како таа ќе изгледа со оглед на зависноста од рекламите.

Твитер е под раководство на Маск скоро две недели, за кое време тој отпушти приближно половина од својата работна сила и повеќето поранешни високи менаџери.

Новиот шеф на оваа социјална мрежа ја подигна цената на претплата на опцијата Twitter Blue (пристап до премиум функции) на 8 долари, што вклучува проверка на корисникот. Во меил до вработените, Маск додаде дека сака претплатите да сочинуваат половина од приходите на Твитер.

Пред пристигнувањето на Маск, Твитер имаше постојан договор со вработените за работа од секаде, при што многумина се одлучија да работат од дома поради пандемијата. Тоа беше една од првите теми на заедничкиот состанок на Маск со персоналот на Твитер, откако тој го најави купувањето на компанијата минатата пролет. Уште тогаш рече дека е против работа од дома и дека ќе дава исклучоци од тоа правило само од случај до случај.

„Пред нас е тежок пат кој ќе бара интензивна работа за да се постигне успех“, напиша Маск во пораката до вработените. Во друга порака, тој додаде дека „апсолутен приоритет за следните неколку дена е да се најдат и суспендираат сите проверени ботови/тролови/спам“ од Твитер.