Задар го совлада македонскиот првак со 71:65 во петтото коло во јадранската конкуренција. Наредниот викенд „аеродромци“ против Карпош Соколи
Петти пораз во петтиот настап во АБА лигата и за МЗТ Скопје. Му го нанесе тимот на Задар кој во својата сала „Крешимир Ќосиќ“ славеше со 71:65. Домашниот тим ја осигура победата во првиот и во последниот период од средбата што ги доби со 25:23 и 17:13.
Во своја полза го реши и вториот со 17:12 на што со иста мера возвратија „штрковите“ во третата четвртина. Иван Маринковиќ, екс кошаркарот на МЗТ Скопје, ја предводеше листата на стрелци во домашната екипа со 17 коша, поддршка имаше од Рамљак кој го заврши дуелот со 13 поени. Најмногу (19), сепак, постигна Јуре Лалиќ, но недоволно за „сино-белите“ од „Јане Сандански“ да избегнат пораз.
МЗТ Скопје и Карпош Соколи се единствените екипи без победа во јадранската кошаркарска конкуренција по петте кола досега. И така ќе биде до наредниот викенд што го носи и првиот македонски дуел во АБА лигата.