Една Французинка го обвини Роман Полански за силување во Швајцарија во 1975 година кога имала 18 години, објави парискиот весник „Паризиен“, само неколку дена пред премиерата на новиот филм од режисерот кој во САД е обвинет за силување на малолетничка.

Валентин Моние, чии обвинувања следуваат по обвинувањата од други жени во последните години, рече дека не поднела тужба, но одлучила јавно да го обвини Полански поради прикажување на филмот „Офицер и шпион“ (J’accuse) за непочитување на правдата во аферата Драјфус.

„Не бев во врска со него. Ниту лично ниту професионално. Го познавав површно“, изјавила за весникот фотографка која била манекенка во Њујорк и глумела во неколку филмови во 80. години, меѓу кои и „Тројца мажи и бебе“. Таа тврди дека се работело за многу насилен напад.

Адвокатот на режисерот, Ерв Темим, за „Паризиен“ изјави дека Роман Полански одлучно го отфрла обвинувањето за силување и истакна дека наводниот настан од пред 45 години никогаш не бил пријавен кај правосудните органи.

Полански призна вина за полов однос со малолетничка во 1977 година и беше осуден на 90 дена затвор, но беше ослободен по 42 дена. Кога дозна дека судијата планира да му изрече повеќегодишна затворска казна, тој од САД избега во Франција.

Оттогаш се појавија повеќе обвиненија. За време на филмскиот фестивал во Кан во 2010 година, британската актерка Шарлот Луис го обвини за сексуално злоставување во 1983 година, кога имала 16 години. Друга жена го обвини во август 2017 година за ист престап од 1973 година кога имала 16 години. Во септември во 2017 година, Ренате Лангер, поранешна актерка, го обвини за силување во 1972 година во Гштад кога имала 15 години.

Адвокатот на режисерот тврди дека обвинувањата на тие три жени се неосновани.