Скопското муфтивство прво бара средба со претставници од општина Карпош за да ги согледа работите поврзани со џамијата во Злокуќани па дури потоа ќе излезат со став во јавноста, ни изјави денеска секретарот на муфтивството Неџми Ферати, иако деновиве од таму ги посочуваа вторник или среда кога јавно ќе се произнесат за случајот. Од муфтивството денеска не ни одговорија ниту на прашањето за уште една џамија – дивоградба во Средно Нерези за што први обелоденија од партијата Левица кои излегоа и со детали дека објектот се гради на имотен лист чиј сопственик е исто така  ИВЗ.

Од инспекторатот на општина Карпош информирале дека постапката за рушење на објектот во Средно Нерези е започната уште во јуни минатата година и дека веќе било издадено решение за отстранување на градбата, пишува „Вечер“.

Фото: Вечер

– Општината Карпош треба да го урне објектот. Имаме Годишен план за отстранување на бесправно изградени објекти, кога според тој план ќе ѝ дојде редот и оваа градба таа ќе се урне. За сево ова се информирани и советниците од Левица – информирале од Инспекторатот на Општина Карпош.

Во меѓувреме, средба со општинското раководство односно со градоначалникот Стевчо Јакимовски бараат и очекуваат да се случи и од џамискиот одбор во Злокуќани, во спротивно излегуваат на протести, ни изјави Тефик Махмут, лице кое, како што се претставува логистички и правно им помагало на верниците.

Кандидатот за градоначалник од Левица на Шуто Оризари Тефик Махмут, негира политичка заднина во случувањата со џамијата во Злокуќани

Тефик Махмут кој на последните локални избори настапи како кандидат на Левица во трката за градоначалник на Шуто Оризари, негира дека политиката вмешала прсти во изградбата на џамијата во Злокуќани, зашто тој  не бил партиски член туку претставник од граѓаните.

– Не сум член на ниедна политичка партија и правната помош и активизмот е нешто што го правам цел живот. Навистина не би сакал да го дефокусирам проблемот — истиот проблем има дискриминаторска димензија и на тоа би се фокусирал најмногу, изјави за НоваТВ Махмут.

Тој  уште негира дека „помошта“ за верниците е поради потписи за формирање на своја партија.

– Потписите се собрани  во Октомври и заверени на нотар. Нема апсолутно никаква поврзаност. Уште еднаш, ова го правам цел живот како во Македонија, така и во регионот, дециден е Тефик Махмут, екс кандидатот за градоначалник на Шуто Оризари  од Левица.

Инаку, од скопското муфтивство вчера потврдија дека имотниот лист од џамијата во Злокуќани е во нивна сопственост, дека тие им дале верска дозвола на верниците од тој дел дека можат да градат објект и да ја практикуваат верата уште во 2016 година, но како што рекоа, ние не сме тие што издаваат дозвола за градба, бидејќи претходно од општина Карпош  изјавија дека објектот е дивоградба и дадоа 15 дневен рок да ја срушат самите а во спротивно на сцена стапува државниот инспекторат за градежништво и урбанизам.

Вчера исто така, од џамискиот одбор во Злокуќани информираа дека оствариле средба со правниот тим за урбанистички работи во општина Карпош, на која им било кажано дека формално-правна одлука за уривање на џамијата, немало.

-Искрено се надеваме и силно веруваме дека нема да дојде до нешто такво. Но, доколу се одлучат надлежните органи на нееднаков третман, најавуваме дека ромските заедници од ромските населби во Злокуќани,Топаана,Ѓорче и Шуто Оризари ќе организираме:

– Протести за нееднаков третман и доскриминација врз основа на етничка и религиозна припадност.

-Претставки до национални и меѓународни тела кои работат во областа на мониторирање и извршување на човековите права.

Нашата држава е мулти-религиозна држава, каде што највисокиот правен акт ни го гарантира правото да си ги негуваме и прокламираме културните и религиозни вредности во оваа држава без разлика на нашата етничка припадност.Без разлика дали станува збор за минаре или камбана, ако веќе имаме вакви иницијативи, не може и не смеат истите да важат само за Ромите.

Не може и не смее само ромските сиромашни заедници заедно со верските објекти да им бидат трн во око на македонската јавност.

Уште еднаш, искрено се надеваме и силно веруваме дека највисокиот правен акт во државата ќе важи и за ромските муслимани во нашата држава.

Еднаквост и правда, почитување на правата на малцинствата, заедно со помалкубројните заедници во државата, треба да ни бидат параметрите кои ќе не водат до нашата колективна цел — евроинтеграција на нашата држава, се наведува во дописот до медиумите од џамискиот одбор во Злокуќани на кој е потпишан Тефик Махмут.

Најави за  самоорганизирање и протести има и од локалното население , кое реагира  што градбата речиси ,,никнала“ преку ноќ и што немало никаква информативна табла, кој гради и што гради. Најавуваат протести и поради тоа што новодојдените за да се згреат користеле гуми и останати неконвенционални материјали за затоплување кои чаделе од што печеле очите и не можело да се дише.

(М.Т.)