Вест со возбудувачка содржина од НАСА. Лоцирана е „блиска“ планета наречена „Суперземја“ на која можеби има услови за живот каков што го знаеме. Во системот е заведена со кодно име „ГД 357 Д“ која е пронајдена од меѓународна група на астрономи кои ја забележаа на хоризонтот со помош на телескопот „ТЕСС“.
Од податоците што засега се достапни за јавност е дека се наоѓа во соѕвездието Хидра и од Земјата е оддалечена 31 светлосна година (единица за растојание со која се означува оддалеченоста што слетлината ја минува за една астрономска или сончева година или 6 трилиони милји, односно, 10 трилиони километри). Претпоставките се дека е двојно поголема од нашата планета и според изгледот на обвивката, научниците веруваат дека би можело да има вода на нејзината површина.
„Доколку планетата има густа атмосфера што треба да се утврди со идните истражувања, тоа може да доведе до акумулација на доволно топлина за загревање и за присуство на вода“, се вели во изјавата на Дијана Косаковски, истражувач во Институтот за астрономија „Макс Планк“ во Хајделберг, Германија.
„ТЕСС“ залови уште два „света“ во близина на „Суперземја“. Едниот се води како „ГД 357 Б“ или „Жешка земја“ и орбитрира 11 пати поблиску до својата ѕвезда домаќин одошто Меркур до Сонцето и се верува дека е температура на површината од 490 Фаренхајтови степени или 254 степени Целзиусови.
„Но, шоуто го украде соседната планета „ГД 357 Д“. Набљудувањата покажуваа дека за 55,7 дена орбитрира околу својата ѕвезда на една петтина од оддалеченоста меѓу Земјата и Сонцето што, исто така, наведува на помисла дека може да има живот“, се вели во соопштението на Универзитетот Корнел во САД.
„Ги изградивме и првите модели како би можел да изгледа животот во тој нов свет. Само да се потврди дека би можело да има вода на нејзината површина, тоа би било мотив за научниците да најдат начини за откривање на знаци на живот“, вели Џек Мајден, кандидат за доктор на Универзитетот Корнел и коавтор на студијата.
Другата планета во соседството е заведена како „ГД 357 Ц“, од Земјата е помасивна за 3,4 пати и веројатно има површина со температура од 260 Фаренхајти или 127 Целзиусови степени, нагласија претставници на НАСА и изразија уверување дека наскоро ќе може да се бараат знаци на живот на „ГД 357 Д“ со други телескопи.