Над една третина од вкупната популација во Македонија или 35 проценти се целосно вакцинирани против ковид-19, а барем една доза на вакцина примиле 38 отсто од граѓани, покажуваат податоците на Министерство за здравство (МЗ).
Нова француска студија покажува дека вакцинацијата против ковид-19 го намалува ризикот од хоспитализација и смрт за 90 проценти кај луѓето постари од 50 години и се чини дека е ефикасна против Делта варијантата на вирусот.
Ова значи дека вакцинираните луѓе имаат девет пати помал ризик за хоспитализација или смрт од ковид-19 отколку невакцинираните луѓе, изјави епидемиологот Махмуд Зуреик, кој ја предводи научната група Епи-Фаре, за АФП.
Во студијата се наведува дека од 14-тиот ден по втората доза на вакцината „забележано е намалување на ризикот од хоспитализација за повеќе од 90 проценти“.
Истражувањето е направено според податоци од 11 милиони вакцинирани лица, постари од 50 години споредбено со податоци за 11 милиони невакцинирани лица во иста возрасна група, во период од 27 декември во 2020 година до 20 јули оваа година.
Ова истражување се однесува само на вакцините „Фајзер“/„БиоНТек“, „Модерна“ и „АстраЗенека“. Во Северна Македонија се достапни „Фајзер“/„БиоНТек“, што е дозволена и за лицата од 12 години и „АстраЗенека“, која е достапна за лицата над 60 години.
Комитетот за имунизација препорача трета доза „Фајзер“ не само за лица над 60 години и за здравствени работници, туку и за кои било други граѓани доколку се изложени на ризик од ковид-19, поради тоа што имаат чести контакти на работа или приватно, без оглед на возраста и дали имаат или немаат хронични болести. Податоците од МЗ покажуваат дека трета доза до 9 октомври примиле 782 граѓани.
Оваа недела се очекува да започне и тестирање на 8.200 ученици од основните и средните училишта. Тестирањето ќе се одвива по случаен избор од регистарот на Е-дневникот и во согласност на нивните родители.
Скринингот е предвиден да трае пет дена, а дневно да бидат тестирани по околу 1.600 деца, во самите училишта. Тестирањето во средните и основни училишта, како што појаснуваат надлежните, се одвива со цел да се добие податок за евентуална трансмисија на вирусот во училиштата.
Во училиштата вакцинирани се околу 75 отсто од наставниците, додека настава на далечина следат околу два процента од учениците, според податоците на Министерството за образование и наука (МОН).
Најмногу активни случаи има во Скопје – 3.550, Куманово е на второ место со 612 активни случаи и на трето место е Тетово со 187.
Досега во земјата се направени вкупно 1.324.894 милиони тестирања на ковид-19. Вкупниот број ковид-19 дијагностицирани лица во земјава од почетокот на епидемијата изнесува 195.002, бројот на оздравени
пациенти е 181.196, на починати е 6.849, а на активни случаи изнесува 6.957.