Индија загуби контакт со вселенското летало „Викрам“ што се обиде да слета на јужниот пол на Месечината за да постави возило во потрагата по знаци за постоење вода на земјиниот сателит, објави денеска индиската Организација за истражување на вселената. Засега сè уште се непознати причините за прекинатите врски со мисијата.
Индиската организација соопшти дека спуштањето на леталото кон Месечината било нормално до вториот километар од лунарната површина и дека е во тек анализа на податоците за да се утврди што точно се случило.
Мисијата „Чандрајан 2“, за која се потрошија околу 140 милиони американски долари, имаше за цел да ги анализира кратерите на „темната страна на месечината“, каде има резерви на вода што беше потврдено од мисијата „Чандрајан 1“ во 2008 година.
Новата мисија почна на 22 јули од вселенскиот центар во Сатиш Даван на островот Шрихарикота, по што „Чандрајан 2“ мина неколку недели на пат кон Месечината за конечно да влезе во орбитата на 20 август. Вселенското летало „Викрам“ се одвои од главниот брод на 2 септември и започна серија маневри за да се подготви за слетување.
Со успешно слетување на вселенското летало, Индија ќе станеше четвртата земја што го сторила тоа и само трета земја што поставила роботско возило по САД, Русија и Кина која, пак, во јануари, стана првата земја што стигнала до оддалечениот крај на Месечината. Во април, израелско вселенско летало се урна на неколку моменти пред слетување.