Сè уште трае инспекцискиот надзор во општата болница во Охрид каде викендот не беше примена 66 годишната пациентка од Струга која подоцна почина во Скопје од коронавирус. Во текот на денешниот ден треба да биде готов целиот извештај, но она што досега го потврдиле инспекторите е дека има прекршување во однос на давање на здравствена заштита на пациент.
Директорката на Државниот здравствен и санитарен инспекторат, Иринка Сотирова денеска информира дека сè уште се земаат изјави од сите кои работеле тој ден или наредниот ден на Инфективната клиника во Охрид.
„Инспекцискиот надзор сè уште трае, но од досега добиените информации е утврдено прекршување во однос на неовозможување на здравствена заштита на пациент. Се однесува на здравствен работник кој бил дежурен во времето кога пациентката е донесена на преглед. Точно е дека матичниот доктор има издадено упат. За сите други прашања ќе одговорам и ќе го информирам министерот во извештајот што ќе биде подготвен денеска затоа што сè уште се земаат изјави од сите оние кои работеле тој или следниот ден на Инфективната болница во Охрид“, рече Сотирова на прес-конференцијата во Владата.
Посочи дека на Инфективното одделение во Охрид работат двајца специјалисти и двајца специјализанти и медицински персонал и оти одговорноста ќе се утврдува од страна на Државниот санитарен и здравствен инспекторат. Инфективното одделение, како што рече Сотирова, во овој момент функционира.
По обелоденувањето на овој случај, министерот за здравство Венко Филипче викендот на прес-конференција најави разрешување на директорката на Охридската болница. Предмет отвори и Јавното обвинителство.