Министерството за внарешни работи вечерва приведе шест лица по инцидентот што се случи во ГОБ „8 септември“ каде се заканувале кон докторка од Ковид центарот. Меѓу нив има и роднина на починат пациент од коронавирус кон бил пријавен за вербални закани со уште неколкумина кон медицинското лице и спроведен е со специјален протокол во полициската станица во Гази Баба.

Во врска со инцидентот се огласи и доктор Христијан Костов, директор на ГОБ „8 септември“ кој за „Слободен печат“ изјави дека десетина членови на семејство на 60 годишна пациентка која пет дена била на респиратор, но, за жал, ја загубила битката со коронавирусот, се собрале пред болницата и се однесувале агресивно. Затоа и, како што истакна, морало да реагира обезбедувањето и да пријави во полиција, но тврди дека оружје не било инволвирано во инцидентот како што објавија дел од медиумите.

„Се работи за 60 годишна жена која пет дена била на респиратор. Луѓето чекале надвор и сакале да го земат лешот, но тоа не е дозволиво бидејќи пациентката била позитивна на Ковид-19. Од Бутел по протокол доаѓаат во скафандери и со посебна опрема. Почнало групирање, членовите на семејството биле агреснивни и се заканувале, па нашето обезбедување повикало полиција. Имаме такви инциденти постојано. Ни ги носат в болница во многу тешка состојба, со сатурација 20, едвај дишат не можат да земат воздух. Во случајот барале да ја земат пациентката од болницата, но со заразен леш тоа не смее да се дозволи. Имаме протокол според кој АД Бутел со своја опрема го носи телото на патоанатомија по претходно напишана упатница за патоанатомски Институт, изјави Костов за „Слободен печат“.