Турција тврди дека не била цел на иранската ракета соборена од системите на НАТО над источниот Медитеран, наведувајќи дека ракетата веројатно била насочена кон грчкиот дел од Кипар.
Турски функционер денес изјави дека Турција „не била цел“ на ракетата лансирана од Иран, која беше соборена од системите за воздушна одбрана на НАТО додека се движеше кон турскиот воздушен простор.
Веруваме дека Иран целел база во грчки Кипар, но таа отстапила од својот курс, изјавил турски дипломатски функционер, според „Катимерини“.
Турското Министерство за одбрана претходно соопшти дека ракетата прелетала над Ирак и Сирија пред да биде соборена од воздушните и ракетните одбранбени системи на НАТО стационирани во источниот Медитеран.
Немаше непосреден коментар од САД, кои имаат воздухопловни сили во воздухопловната база Инџирлик во јужна Турција, која граничи со покраината Хатај, каде што турските власти велат дека паднале остатоците од пресретнатата ракета на НАТО.
Ги предупредуваме сите страни да се воздржат од дејствија што дополнително би го ескалирале конфликтот во регионот. Во овој контекст, ќе продолжиме со консултациите со НАТО и нашите други сојузници, соопшти турското Министерство за одбрана.
Како што беше објавено, немаше жртви или повредени во соборувањето на иранската ракета.
Сите потребни чекори за одбрана на нашата територија и воздушен простор ќе бидат преземени решително и без двоумење. Ги потсетуваме сите страни дека го задржуваме правото да одговориме на какви било непријателски дејствија против нашата земја“, се додава во соопштението.
Турција го повика иранскиот амбасадор во земјата на состанок, со цел да изрази протест поради испуканата балистичка ракета во турскиот воздушен простор. Според дипломатски извори, амбасадорот на Иран денес бил повикан во турското Министерство за надворешни работи во Анкара за да турската влада официјално го изрази својот протест.