Русија денеска соопшти дека се предале речиси 1.000 украински војници од џиновската челичарница во Мариупол, напуштајќи ги своите позиции кои беа симбол на отпорот на нивната земја.
Украина им нареди на борците да ги спасат своите животи – и рече дека нивната мисија да ги поразат руските сили е завршена – но не го нарече тоа предавање како што тврди руската страна. Борците сега се соочени со неизвесна судбина, при што Украина тврди дека се надева на размена на затвореници, но Русија најави дека ќе им суди, барем на некои од нив, за воени злосторства.
Не е јасно колку борци остануваат во упориштето, последното во Украина во градот кој сега е претежно претворен во урнатини. Двете страни се обидуваат да го обликуваат наративот и да извлечат пропагандни победи од она што беше една од најважните битки во војната.
Портпаролот на руското Министерство за одбрана, генерал-мајор Игор Конашенков, денес изјави дека 959 украински војници во последните 24 часа ја напуштиле фабриката Авозстал. Во еден момент, официјалните лица наведоа дека бројот на борци кои се кријат во големата мрежа од тунели и бункери на фабриката е дури 2.000.
Бројките, доколку бидат потврдени, сугерираат дека Москва можеби се уште не може да тврди дека паднал целиот Мариупол. Војниците со месеци ја бранеа фабриката но во вторникот министерот за одбрана на Украина рече дека издал нова наредба до борците „да си ги спасат животите“.
Што ќе се случи сега со борците не е јасно. Некои од нив се однесени во поранешна казнена колонија на територија контролирана од сепаратистите поддржани од Русија. Украина вели дека се надева дека тие можат да бидат разменети за руски воени заробеници и дека преговорите се чувствителни и одземаат многу време.
Но, во Москва се зголемуваат повиците за судење на украинските војници. Главното федерално истражно тело на Русија соопшти дека има намера да ги испрашува војниците за да ги „идентификува националистите“ и да утврди дали тие биле вклучени во злосторства против цивили. Исто така, главниот руски обвинител побара од Врховниот суд на земјата да го прогласи украинскиот Азовски полк за терористичка организација. (преземено од Асошијетед Прес)